عمك صميده عبد ربه

عمك صميده عبد ربه بخاتي
من فجر ربه للمسا بيهاتي
شيال حمول ربك واعلم بيها
والسعي ع اللقمة ياعمي دوم ويوماتي
الخلفه كلتها ياعمي بنات
محروسه تماضر ونيفين وبرضه وزينات
والعيشة صعبه ع الثلاث وجبات
ساعه شوارهم ربك كريم ويآتي
في الجامعه منهم تماضر وقبل منها زينات
بنات آماره تقولش حلويات
واتنين يساعدوا رزقهم مع ابوهم
اما تماضر صنف تاني ياخال
عاوزه المحزق والملزق واللي بنات جيلها يلبسوه بالذات
اما زينات ياخراشي عليها
هي الحنونه ونن عين والديها
فاهمه حياتهم بس ايه بإيديها
م الجامعة تطلع شغلها طوالي
تدعي لمولي الموالي يصلح الاحوالي
وتقول لابوها خف ياابه شويه
الصحة تعبت وانت ضي عنيه
ياما نفسي تسكن قصر عالي ياابويا
في وسط قصرك تلقي فيه فسقيه
نفسي اعوض تعب سنينك لكن
الفقر يابا لابد فينا وماكن
نفسي تحج تزور نبينا الزين
تدعي لربك في اعز أماكن

في يوم تماضر وشوشت لدواهي
الأم دايما سرها الساكن
قالت عريس لقطه
لا يمكن يامه اسيبه
شاب حليوة دايما ونافخ جيبه
كل البنات يامه وعينها عليه
اختار تماضر تبقى ضي عينه
وعنده شقه فيها يرمح الخيال
وفيلا برضه فيها برضه وساكن

دواهي قالت ياصميده الواد ياعيني اختارها
لابد لازم يبقي قيمة شوارها
بنتك اتاها اللي هيقدرها
قوم شد حيلك يلا ونقدرها
سجادها عجمي والنجف م الغالي
ونيشها ارو تشرح البالي
غسالة م اللي في الإعلانات بنشوفها
ثلاثه وفريزر ما حد عرفها
والصيني مدهب ومين ياخال يعرفها
شوار حبيبي لابد هيشرفها
قال منين واشكي لمين حالي

ومين يقول عنك ويغني ياناس موالي
القصد عمي صميده م الفجر
راح قوام ع البنك
الحل هو القرض
لجل ما نسترها
عارف ياناس اخرته
وعارف كمان اغوارها
والبنك يابه قرض يجلب قرض
الاف صار الوفات
نساني سنه وفرض

وجهز البنت والفرحه تساع الأرض
ما عم صميده غرضه يصون العرض

والواد حنيدق ياعمي
منور في قلب الكوشه
زغروطه تملي الكون
من خالتك يا وادعيوشه
وشوش في ودن صميده
العم جمال دعدوشه
قال له عريس بنتك
ياسيدنا اصله افيونجي
معروف عند الحكومه
من يومه ولومانجي
واد شبيح ياعمي واصله كان منزولجي
عمك صميده يمضغ م الهموم
كام كيله
حواليه بنات ترقص وعامله هليله
واللي تقول بختها عقبالي كمان ياحليله
ومين غيرك صميده
علي راسه شال دي الليله

لحظة ودخلت حكومة
عمك صميده يقابل
جوازه صبحت جنازه
واختلط حابل مع نابل
فتش جيوب حنيدق
يالهوي الفبن يانيله
فيه ممنوعات ياجدع
شالوا العريس الغفله
فوق القفا هيشيل لوحده الشيلة
تصرخ دواهي تقول
محسوده يابنيه
حسدوك والله العوازل
ياطير في بنيه
كان قصدي تتستري والرك قال ع النيه

تلطم تماضر ياخال
والدمعه فوق الخد
الواد طلع محتال
دقيت ياساعه الجد
ومنين اسدد ديوني
والخيبة زاد ع الحد
والبنك يبعت رسايل
الدفع او الحبس
الحجز ما يكفي
وناره ما تطفي
وعزولي متشفي
وكلبش وف كفي
ولا حد في صفي
والحيطه صبحت سد
حكمه قالوها زمان
وقالتها ستي نفوس
قعاد خزانه ولا جوازه
لواد متعوس

قلنا ياما ولسه ياما نقول
قعاد خزانه ولا جوازه ندامه
وفين نلاقي عقول
صوره رسمها ابو العزم
بيها نفتح المقفول
احمد كامل عطا بالفن بال مشغول
يحيي يكتبها من روحه ومن دمه
عشاق جمال النبي
صلو بقي وسموا
مع قصه ورسمه وقصيده
أحبابنا يتلموا
يارب اجعل قولي خالص لوجه رب كريم
حلوه صلاه النبي
وزيادة في التسليم
@#الجميع