السلام عليكم ورحمة الله وبركاته
كل عام وانتم بخير
أهلا ومرحبا بكم في الحلقة الرابعة من برنامج #صور_موفوصة
(٤) الحلقة الرابعة
#قطع_الأرحام
،،،،،،،،،،،،،،،،،،،،،،،،
عم يحيى مساء الخير
ياابو ياسر كيف احوالك
قوللي بقى ياوش الخير
الليلة دي ايه موالك.؟
........ ...... .........
والله ياعم ياابوالمصابيح
الحالة ويعني ما تسرِّش
وحشني الأهل مع الخلان
لو برضه زيارة ماتضرش
طب ليه نْقطَّع ف الأرحام.؟
وهيّا من أسباب الرزق
ولا بنقولشي أي كلام
كلام رسولنا حق صدق
شوف ياسيدنا بدون كلام
تعبنا من قطع الأرحام
واللي حاصل واللي جاري
في شرع ربك يبقي حرام
صدق رسولنا الكريم وسمعنا ونسينا
صبحنا اخر زمن ونسينا اسامينا
والرزق ف اللمة وف صحبة محبينا
صحبة محبينا. أهل مع خلان
وزيارة أهالينا خصوصي في رمضان
أيامه والبركات
مليانة بالخيرات
فرصة وجت لينا.. ونعدِّل الميزان
صلة الرحم فرض وسنة
لكن ضيق الحال يمنعنا
منين نجيب وانا مش طايل
عشمان ف رب كريم يجمعنا
ياعم يحيى.. مابلاش كدا
عن أفكارك انا مش راضي
نقاطع الاهل علشان كدا
ياعم زورهم وادخل فاضي
أدخل فاضي.. يادي العيبة
تبقي جُرسة ياعمي وخيبة
قول الحق ياابو المصابيح
ليه ياعمي نهين الشيبة.؟
هذي والله ماهياش عيبة
ديَّه وسوسة م الشياطين
يقول يايحيي تبقى عجيبة
يقول للأهل نروح فاضيين
يفضل شوشو يوسوس لينا
لا مليان ولافاضي رايحين
بص ياخال وهقول الحق
التقصير موجود مش ناكر
هنقول أيوه،، ونقول لاء
اخر مرة كمان مش فاكر
امتى زرت وامتي زاروني
امتى هنرجع تاني نذاكر.
ونقول سنه ياناس مهجورة
زيارة أهل امس وباكر
اوعى تقول سنة ومهجورة
دا حنا ياباشا المحرومين
صلة الرحم أرزاق موفورة.
مين يستغنى عنها ومين
والله ياخال مبنتسغناش
أهلك.. تُهلك.. رحت بلاش
ربك رحمن خلق الرحم
ومين يقطعها يكون غشاش
هيَّا بتستعيذ بالرحمن
من القاسي اللي بيقطعها
ولكن طمنّها الحنان
انه هايوصل من يوصلها
يعني القصد خلاصة القول
لجل كلامنا يكون معقول
ربك وصي بالٱرحام
من يوصلها يكون موصول
.
الأهل ياعم. وصِلة الدم
سند وعزوة..ولا الأحلام
مش نستنى بقى مناسبات
واحد اتجوز .. واحد مات
عشان الود يكون موصول
لابد من صلة الأرحام
قبل ماننصح غيرنا ياخال
خلي الفعل ف قولنا تمام
تصبح حياتنا عال العال
وماشية على شرع الاسلام
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
طب انت جي بكرة ياعم
طبعا جي ياخفيف الدم
بكرة كلامنا يكون عن ايه
بكرة نقول.. مستعجل ليه.؟