السلام عليكم ورحمة الله وبركاته
أصدقائي الأكارم كل عام وانتم بخير
يسرنا أن نلتقي بكم طوال أيام شهر رمضان المبارك مع برنامج
#صُوَر_مرفُوضَـــة_
بمشاركة الشاعر القدير وشاعرنا الأروع مصباح أبو حماد
( ا ) الحلقة الأولى
(#المفطرون_بغير_عذر)
.................
قول يايحيى بقي متعنا
لجمال حرفك أجمل معني
قوللنا حاجة عن شهر الصوم
في دنيا وآخرة راح تنفعنا
منك ياعمي انا بتعلم
نظم الكلام ياسلام سلم
اللي يصوم محلا صيامه
و اللي بيفطر ربي يسلم
أنانويت يابوالمصابيح
اتكلم. بس كلامي صريح
ع اللي بيفطرو في رمضان
ومافيش ليهم عذر مُبيح
والله دي فكرة عال العال
ياللا نعمل عنها سجال
بس انا صايم مانش فاطر
إوعى يكون جيتك ع البال
اللي بيفطر قالوا زمان
إما مسافر. اما عليل
رخصة من عند الرحمن
وبدون رخص ياسيدنا ذليل
أنا بشوف ف نهار رمضان
شاب بيفطر عيان وبيان
لا في خشا ... ولا احترام
كمان بيجــاهر بالعصيان
شفت ناس حقها رخصة
واما بتفطر. ليه تتألم
وناس بتفطر وبدون رخصة
و ع البجاحة ياسلام سلم
فنجر سيجارة وسط الناس
ولابيراعي شعور الغير
لاعنده دم ولا احساس
ولا جُواهشي ذرة خير
قولك ياعمي والله مليح
مليون سلام لأبو المصابيح
وفين نروح جنب كلامك
زي الزوابع قصدي الريح
حتى ان فطروا زي مافطروا
ليه بيجاهروا بيه ويفاخروا
ولايعملوا ...... بمأثور القول
(إذا بليتم فلتستتروا)
دول مبسوطين ويا مجاهرة
ويقولَّك انا الواد العترة
محروم يوم اللقا من نظره
من رب العالمين بالمرة
ياعم يحيى هانقول ايه.؟
للي ناقصه كتير في الدين
شهر ف عام وشوقنا إليه
فرصة نتقّل في الموازين
محلا ياعمي باب الريان
مفتوح خصوصي للصايمين
شهر واحد في العام لكن
هتعمل ايه لأبو مخ تخين
دا اللي بيفطر بلا أعذار
يخسر قوي. يتلغبط حاله
لو صام حتى ليل ونهار
حتى ان صام دهر بحاله
فاكر ابويا ودا كان شيبة
اقول له افطر. يقول عيبة
اقول دي رخصة من الباري
للي ابتلى.. يقول لي عجيبة
لا عنده دم ومش مكسوف
من ولاد صايمين بيشوف
و يقعد معاهم ع الطبلية
يسبق ع الاكل. وملهوف
ايه العمل وقولي رأيك
في اللي للشرع معاندين
الشوري ليك والقول رايك
دول شرزمه والله منافقين
أنا ماليش كلام ويّاه
دينَّا وشرعنا يحكم فيه
فقه السنة يروح يقراه
وقبله كتاب ربنا يِفتيه
طب صاحبنا هيعمل ايه
اللي فهمته قول له عليه
عنده الحل يروح يقراهـ
يقرأ ف باب الصوم يلقاه
أول حل هايعتق رقبة
بسِّ زمانَّا مافيهش عبيد
يدخل بقى ع الحل التاني
يصوم شهرين ورا بعض أكيد
ولايفطرش خلالهم يوم
ولاهـ ينقَّص .. ولاهـ يْزيد
وان ماقدرش عليه بالتالت
يطعم م المساكين ستين
قول الشرع ماعنُّه يحيد
بارك الله في الصايمين
من باب الريان داخلين
ويغفر ليهم كل ذنوبهم
وِأخرُه يكونوا م الفايزين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
طب انت جي بكرة ياعم
طبعا جيّ ياخفيف الدم
بكرة كلامنا يكون عن ايه؟
بكرة نقول.. مستعجل ليه.؟
،،،،،،،،،،،،،،،،،،،،،،،،،،،،،،،،،،،،،،،،،،
الثلاثاء مايو 07, 2024 8:01 am من طرف مريم صلاح
