الحلقة (٢٢)
السلام عليكم ورحمة الله وبركاته
أهلا ومرحبا بكم مع حلقة جديدة من برنامج #صور_مرفوضة
..................................
سجال ثنائي.. بوميا في رمضان بمشاركة الشاعر القدير
مصباح ابو مصباح أبو حماد
الحلقة (٢٢)
#علي_القهوة
،،،،،،،،،،،،،،،،،
مساء الرضا والسرور
ع الوش اللي بيبدر نور
ع حرف بيشجيني تملّي
وعشانه انا اعدِّي بحور
مسا الجمال ياابو المصابيح
جاي لك بدري اسابق الريح
عاشق حروف مواضيعك
ان كان عامي ولاَّ فصيح
فكرة وجت لي كدا على سهوه
من غير ما اشرب شاي ولا قهوه
قلت ياعم يحيى ضروري
هـ نشوف سوا موضوع "القهوة"
ع القهوة قاعد وف حالي
مالك انت بقي ومالي
ولا انت قصدك ايه قوللي
ودايما تلخبط أحوالي
ع القهوة قاعد وف حالك
مشاريب علطول نازلالك.
نص مرتب راح ع القهوة
الأولى بيه ياعم عيالك
وفيها ايه ياسعادة البيه
طب بس قو للي دخلك ايه
ولا عمري يوم قلت ادِّيني
وجيبي عمران واعمل ايه
صح..
إنت ماقلت لحد إديني.!!
وأنا ماليش دعوى بشئونك
لكن انت ياخوي على ديني
لك عندي نصيحة ف أمورك
فلوسي من كدي وتعبي
ولا مرة بيها اذيت الناس
جوايا همي ومتاعبي
اضيعه ويا الانفاس
مش بس بتأذي الناس
إنت بتأذي الببت وياك
وكل ماتشد ف أنفاس
تلقي الكحة مش رحماك
والله ياسيدنا قولك حق
بس برضه ان جيت للحق
صحة وراحت ف الأنفاس
قلبي ياخال م الكحة انشق
طيب قوللي ياعم الحاج
صليت عشا واللا التراويح
يعني اسيب البلد وأهجّ
لجل سيادتك ماتستريح
ايوه صلاتي لرب الكون
والتراويح ولا مره تهون
قعده قهوة لا يوم تلهيني
عن فرض وسنه مهما تكون
نص عمرك قاعدُه هناك
والحناكيش دوم تستناك
عاملينك انت معلمهم
وبيقضُّوها على قفاك
راجل دايما ملو هدومي
والاصحاب دايما والشلة
واخد دايما سعدي ف كومي
حود جرب مره انشاء الله
حارم نفسك. حارم أهلك
كلمة زين يقولوها معاك
فيها راحتهم فيها أُنسك
ومودة معاهم تلقاك
دايما سيدنا حاشر نفسك
مالك والله بس ومالي
قوللي بس ايه في نفسك
وانا بتصرف مالي حلالي
ومصالح بيتك تتركها
تتكاسل عنها وتهملها
ومكبر جدا في الطاسة
وحمولك مين اللي يشيلها
هي ساعة.... ولا اتنين
وهو العمر ياعمي يومين
ليهم عمري كله الباقي
ولا مره ابقي بوشين
هيّا الضومنه ويا الشيشة
وإن كان برضه هناك تحبيشة
ترجع قبل الفجر ياباشا
عقلك طاير زي الريشة
سيبك... اصلا ما تقدرش
تقعد زيي قعده أُنس
وانا على زعلك ما اقدرش
دايما غاوي تسد النفس
أنا ماانفعش ف قعدة أنس
فيها خسارة كبيرة للنفس
قعدة أنس تكون لاولادي
اأكسب منها ولا أخسرش
ليه تلوم على المخاليق
ليل ونهار نشفان الريق
ساعة لقلبك ساعة لربك
ربي ينور لينا طريق
هذا دعايا لأعز صديق
ربي ينور لينا طريق
بس ياريت أحوالنا نغير
ونعيش بقى زي المخاليق
توبه نصوحه ودعوة جميلة
ربنا يقبل مني ومنك
تبقي حياتنا ميت ضليلة
يوماتي انا اتعلم منك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،.،،،،،،،،،
طب انت جي بكرة ياعم
طبعا جاي ياخفيف الدم
بكرة كلامنا يكون عن ايه
بكرة نقول،، مستعجل ليه
الثلاثاء مايو 07, 2024 8:01 am من طرف مريم صلاح
