السلام عليكم ورحمة الله وبركاته
أخي الكريم #اقرا_للاخر_ومش_هـتندم
مع حلقة جديدة من برنامج #صور_مرفوضة
بمشاركة الشاعر القدير
ا مصباح أبو حماد
الحلقة (١٩)
#_ظاهرة_التســوُّل
،،،،،،،،،،،،،،،،،،
ياعم يحيى شوقك طوِّل
وشوقي ليك اكتر م الأول
خلي كلامنا الليلة يكون
عن الشحاتة أو التسوُّل
مهنة عظيمة عليها القيمة
دايما مكسب ولا تخسرشي
فيها زناتي وخالتي عظيمة
فيها فن ما يتقدرشي
مااحلى فنونك يافنان
وانت ممثل دور غلبان
بالجلابية الوسخة العيرة
وبأسلوب مليان أشجان
أيوه فن وليه.......أسرار
وف تجديده ليل ونهار
وفيه متخصص كل مجال
زي مافيه يكتبو أشعار
فعلا كل يوم في جديد
وليها نظام وفيه مواعيد
واللي يخل يوم بنظامها
أكيد يبقى عقابه شديد
طيب إسمع واحكم مرة
وان ما عجبك إوزن بره
بكتب شعر تسول راقي
يخلي قلب الشخص شراقي
قول هات وانا اسمعهولك
مهنة... وربك رازق باقي
طيِّب سمعني كم غنوة
من سحر.......كلام الفنان
من شعر النصباية الحلوة
وإطربني بأجمل ألحان
إسمع مني هقول أشعار
لو تكتبها تكون شطُّور
فاضي وبكتب ليل ونهار
اوعي تقول شحات مغمور
يشحت بيها خمسه وسته
او شحط ومفرود الجتة
(ياآكلين اللحوم ادوا الفقير حته)
(ياكانزين الهدوم خافوا من العته)
(ياللي معاكم فلوس خلو نظركم
مع الغلابة سته على سته)
فن شحاتة جميل وأصيل
ومافيش عنه حداكو بديل
والمنظومة هناك جمعاكم
تلموا الغلة م المحاصيـل
ولا مرة بنشق جيوب
ولا نعمل مكروه معيوب
فهلوة بس وكام تدميعه
يحن القلب. لوكان طوب
اللي تأجر م الصبيان
كم عيل ويكون عمشان
تغني بيهم ع المخاليق
لجل مايصعبو ع الجدعان
ايوه ياعم وايه راح يمنع
أي حيله معانا بـتنفع
ولاَّ بلاش تجديد ف المهنه
الطم. لاء بالصوت انا هـ ارقع
بس الشغل دا أصله حرام
بتكسب كسب غير مشروع
وكام مخالفة وفيها كلام
والَّا الصراحة شيئ ممنوع؟
ولا الموسم شهر الصوم
تلقي الغلة ياخال بالكوم
جرب مره تبقي معانا
بلا اشعار مش ناقصه هموم
الفقير بسببكم ضاع
مع إنـه مليان أوجاع
بس هوّا ياخال متعفف
ولايتسول مهما ان جاع
عندي ياخال اربع عمارات
في البنك فيزا بالألوفات
وعندي خمسة ولاد وبنات
تعليم عالي..... في كليات
باين عليك إنت معلم
في الشغلة جدا ومعلم
منظومة وانت بتديرها
ونشء كتير جاي يتعلم
هـ احجز ليك رمضان الجاي
احلي رصيف وتجرب حظك
تملا جيوبك رايح جاي
ربي ياابو المصابيح هيحظك
أكاديمي علومك دي ياسيدنا
ومناهج عنها ..... ولاسمعنا
إلاّ في لوايح قوانينك
ودراسة في حياتنا تفيدنا
ليه دايما عاوز تتنمر
علي خلق الله راح تتمنظر
يا تيجي تشارك في المهنه
والا تروَّح بقى تتسحر
حكيمة إدارة شحاتنا
ولامرة بتخر الميّة
لا شركة بتخسر وبتقفل
وارباحك مية ف المية
طيب قولي راي الدين
مهنه حلال دي ولا حرام
ادعيلك يرحم والدين
ويقبل صلاتك ويا صيام
بص ياعم الحاج اسمعنا
لما بنيجي لرأي الدين
يبقى كلامي ولا له معنى
اسمع كلام نبينا الزين(ص)
اللي بيسأل مال الناس
وهو ليها مش محتاج
من جهنم يطلب قطعة
من نيرانها لهب وهاج
دا غير انه فيها كذاب
وبيدِّعي المرض بمزاج
ودا كله مخالف للدين
وخط سيره جاي زجزاج
توبة نصوحة من دي النوبة
ان شاالله ربي يقبل توبة
ياما حاجات بالجهل اعملها
فوق جبيني تكون مكتوبة
والله تعيش ياابو المصابيح
دايما قولك حلو فصيح
دايما اطلع فيها غلطان
ولا مرة تديني تصريح
بكره كلامنا باذن الله
شعر جميل والكل تلاه
عارف كل الناس في تلاه
بس كلامك برضه مريح