الاسكندرية

مسحراتي منقراتي والدق علي طبلي
هليت يا رمضان يا مجمع الأحباب والدق علي طبلي
لما وصل رمضان علي كتفي طبطب لي
وقال لي قوم وكفاية نوم سمعني صوتك دة صوتك دة بيطيب لي
وسحر عباد كما الزهاد في بحري وفي قبلي

اسكندرية مارية وترابها زعفران
محلا جمال بحرها سبحانة جمال فتان
واللي رسم ثغرها احلف دة واد فنان
انا رحت اسحرهم لفيت في كل مكان
م المكس لباكوس م الحضرة للعجمي
دبت في هواالمندرة وشغلتني الورديان
شي الله يا ابو العباس يا زينة الفرسان
شفت موائد تسر النفس دي موائد الرحمن
تنادي ع الصايمين وملايكة حفاهم
زيادة في الأحسان
وسمعت عم سميح بيردد التواشيح
بصوت جميل رنان
وشفت عم احمد بيردد التسابيح
في دلائل الخيرات واقول لة زيدني كمان
مسحراتي ليلاتي اهتف واهاتي
من صغر سني عاشق ترابك يا اسكندرية
من صغر سني قابلت يني
خواجة لكن مصري خدوم
قوم يلا يا شادي دة الفجر بادي وكفاية نوم
جهز سحورك وصلي وترك وانسي الهموم
رمضانا هل والبدر طل قوم وحد القيوم
وانت يا فاطر ما لكش خاطر
يومك ملبد مليان غيوم
واكمني طنطاوي للفن غاوي
احكي حكاوي واقول يا بدوي
شيلاة يا عدوي يا عز الدين يا ابو الرجال