ماذا لو ... كان الشباب هم من وقعوا في مشكلة تأخر الزواج ؟؟!

تخيلوا لو الشباب كانوا هم اللي عندهم مشكلة انعدام الزواج ...
وهو اللي بيستنى الزوجة تجيه عشان يتجوز مش هو اللي بيروح لها ...
ويطول انتظاره وبقى يتعاير بعمره وشكله ومهدد يفضل طول عمره بدون زوجة كانوا هيعملوا ايه ؟؟؟

- كانوا عملوا مظاهرات في الشوارع وقلبوا الدنيا علينا وكانوا طلعوا قوانين تنظم فرق السن بين العريس والعروسة عشان يصلحوا الخلل اللي حصل واللي بسببه شباب كتير قعدوا بدون زواج .

- كانوا طلعوا قانون بالسجن على البنت اللي رفضت شاب من غير حتى ما تشوفه عشان بس عمره مش عاجبها ... او كانوا على الاقل صنفوها انها جنحة .

- كانوا الشباب اللي اتاخر زواجهم رفعوا قضايا تعويض على البنت اللي تسببت في الضرر لهم ورفضتهم واهانتهم لأسباب هايفة على اساس ان رفضها ده بيأثر بشكل كبير على حياته ومستقبله وبيساهم في حرمانه من الزواج وبقاء المشكلة كما هي .


- كانت الدولة فرضت ضرائب على البنات العاملات لتزويج الشباب العازب ... لأنهم لازم يتجوزوا ... حرام ما ينفعش تكون فئة كبيرة من شباب المجتمع واقع في المصيبة دي وحياته شبه مدمرة والدولة وعلمائها بيتفرجوا !

- كانت البنت اللي تقول لشاب اتاخر زواجه يا باير يرفع عليها قضية رد شرف وقذف وسب في العلن ... طبعا الشباب عنده كرامه !

- كانوا عملوا قناة الشباب العازب .. يلموا فيها تبرعات من الاثرياء واعطاء مبلغ مالي محترم لتزويج الشاب اللي اتاخر زواجه عشان يجوز نفسه ... عشان يجبر البنات الفقرا اللي مش لاقيين يتجوزوا انهم يقبلوا بيه على مبدأ ( اطعم الفم تستحي العين ) , بدل ما البنات متفرعنة وبتتبطر حتى لو فقيرة .

- كان الشيخ الأمير ( فلان آل علان ) هبت فيه النخوة والكرامة وتبرع بمبلغ عشرتاشر مليون دولار لتزويج الشباب المسكين المقهور من المجتمع وتأمين العرايس له من أي مكان على وجه الكرة الأرضية .

- كانت القنوات و الشوارع مليانة بإعلانات التوعية :

اتبرع ولو بجنيه .. عشان جوازة اخوك المسلم المبتلى بتأخر زواجه ..

للبنات : رفضك لشاب في سنك .. بتهدمي بيه المجتمع ... هتفرقي إيه عن أي سيجارة ؟ عن أي مخدر ؟ .. انتي عماد المجتمع .. اصلحي فكرك عشان ينصلح مجتمعك ..

( برعاية جمعية تزويج الشباب المظلوم )


تزوجي شاب فوق الثلاثين واكسبي معانا عفش بيت كامل بـ 99 جنيه بس + مصاريف الشحن



حملات توعية البنات المتفرعنة :
أختي .. تزوجي من ترضين دينه وخلقه ... ما تخليش العمر هو اللي يحدد مين جوزك

أختي .. لا تنسي أنك ستقفين يوم القيامة أمام الله وستسألين ... لماذا رفضتي فلان ابن فلان قبل رؤيته زوجاً لكِ ... ماذا ستقولين أمام الله ؟ رفضته لأن عمره تخطى الثلاثين يارب ؟؟
أختي ألا تستحين من خالقك ؟ كيف ستجاوبين الله ؟؟

عندما يسألكِ الله لماذا رفضتي 20 شاباً رشحوا للزواج منك دون رؤيتهم ؟ .. أخية ماذا ستقولين أمام الله ؟؟؟ يارب أصله أصغر مني بسنة وانا اللي اتجوزه كان لازم يكون أصغر مني بسبع سنين !!
أين انتي أختي من سنة النبي محمد ...
أختاه .. أيوجد آية قرآنية أو حديث نبوي شريف يشجع على زواج الشاب من فتاة تصغره في السن ؟ وهل تم تحديد فرق السن بين الزوج والزوجة كشرط لنجاح الحياة الزوجية ...

أخية .. اتقي الله في شباب الأمة ... ستحاسبين يوم القيامة على تكبرك وتجبرك عليهم دون وجه حق ...

أختي المسلمة .. كل شاب جلس في بيت أهله دون زواج وعفة لأنك رفضتيه بسبب عمره ... ذنبه في رقبتك إلى يوم القيامة ...
يا ظالمة ... يا مفترية ... هتروحي من ربنا فين .. فين ؟؟


قناة الخميرة الفضائية في برنامجها الشهير ( الإنعتاه المشاكس ) تتناول موضوع تأخر زواج الشباب .... أسبابه وتداعياته :

هــــــــــل .....
أصبحن الفتايات يشعرن بأفضليتهن على الشباب لمجرد تفضيل النوع الأنثوي على الذكوري في مجتمعنا العربي المتهالك ؟؟؟؟؟؟؟؟
ألا يعتبـــــــــــــر .....
رفض الفتاة لشاب لمجرد أن سنه تخطى الثلاثين .. نوعاً من العنــــطزية والتــــــــــقنعر المفرط ؟؟؟؟؟؟؟؟؟

أيــــــــــــــن ...
الجدعنة والوازع الديني لدى شريحة كبيرة من البنات .. أليس الشباب يجلسون مقعدين في بيوت ذويهم ناتج عن حادث سير أصاب عقليات البنات وأصبحن يبحثن عن المظهر لا عن الجوهــــــر ؟؟؟؟؟؟؟

مــــــــــن ...
يتحمل مسؤولية الشباب الذي لا حول ولا قوة له في وجه تيار دلع البنات العارم الذي يأخذ في طريقه الأخضر والبنفســـــــجي ؟؟؟؟؟؟؟؟؟؟؟؟


معكم في الإنعتاه المشاكس .. في حلقة ساخنة ... تذاع كل نصف ساعة يومياً ... على قناة الخميرة ..
الرأي .. مش الرأي الآخــــــــر