الصوره الغنائيه
#صيادين #السمك
الصوره الغنائيه
سوق السمك
في المقهى المطرب الشعبي بغني
(صياد ورحت اصطاد صادوني)
برمش العين مع الحاجب وصادوني
وانا اللي افدي الحبيب
بروحي وعيوني
نزلت بحر الهوى اشوف حظي مع العشاق
وطلعت انا عطشان
وكل الخلق لاموني
امانه يا أهل الهوى
والعشق دلوني
القهوجي
صباح الفل بنصبح على الحلوين
صباح طاير صباح حاير
بشوق وحنين
صباح الرزق ع الفتاح
مع فلوكه
صباح م البحر جاي براح
ياواد ياحسين
هات شيشه ياواد عجمي وهات حجرين
وشاي ميزه مع اسكتو
لعم امين
عم امين
قوام ياواد ومتعوقش مستعجل
وهات الشاي وع الاسكتو
اتمهل
وهات شيشه تكون هاديه
وهات ينسون لابو فاديه
يجعل اصطباحتك خير
ياواد ناديه
وخف شويه الخطوه
وقعد عمك ابو مطوه
مع الغاليين
وهات رغفين وطبقين فول
وهات دورق كمان ساقع
لأبو سماعين
ابو سماعين
واوعاك تنسي طعميه
تكون م القلب محشيه
وفليفله نار حاميه
وصبح لي ع ابو ساميه
صوت مسجد قريب
وتواشيح صلاة الفجر
سبحان فالق الاصباح
سبحان من شق الفجر ولاح
سبحان الكريم الفتاح
سبحان الله وبحمده
سبحان الله العظيم
الله أكبر الله أكبر
صوت من خارج المقهى
صباحكوا فجرنا النادي
صباح الرزق بينادي
علي الجامع ونتجمع
وندعي المولي يعطينا
نصلي الفجر ونجمع
كل احباب أهالينا
نصلي لربنا نسجد
وندعي المولي ليه نحمد
ينادي كل احبابه
ولا يقفل في يوم بابه
وتبقى الحاله غير حاله
يا محلا أيدينا شغاله
يلا ياخلق نتوكل
علي الرازق
يلا الرزق بينادي
وبال رايق
وليه ياصاحبي تضايق
ورزقك في السما مضمون
عيشها ياواد كدة عايق
وود الصحبه اوعي تخون
على المركب
الريس بلاميطه
علي باب الله
قاصدين الله
رزاق الله
فتاح الله
ما بين الشط والميه
ما بين سردينه بلطيه
وكام مركب معديه
وفلايك في وسط الموج
وفوج يعدي بعده فوج ( صلح لي قلوعك ياريس)
حلو البحر هادي الموج
صياد1
رمينا شبكنا وتكالنا على الرزاق
في قلب الميه تتمايل مراكبنا
جرينا نسابق الاشواق
نسينا لبس مراكيبنا
ولا مرة هينسانا رب كريم
ولا هموم بتركبنا
صياد 2
رمينا حمولنا عللي مقسم الأرزاق
ومين لينا ياناس غيره
فراق لقا وبعده فراق
وسبح في السما طيره
ما بين مالح وعذب ياخال
برزخ ربك نظم سيرة
صياد 3
ومن كان رزقه على ربه
ومن كان ماشي في دربه
ولا يحمل هموم وفراق
الريس بلاميطه
الشمس طلعت والبحر هادي
والرزق وافي والرب راضي
صباحكوا نادي قرب ياشادي
هات الطوايل ولم الطوباره
شوف الكابوريا عامله لها غاره
ورزق ربك مش بالشطاره
محلا الدنيس محلا الشباره
وبلطي يلعب محلا جماله
ربك وابدع ما فيش مثاله
ثبت ياواد الشنشوله
البركة والرزق على الله
والطعم حي بيتلاعب
مشا الله ع الرزق مشا الله
البحر صفحته زي الزيت
كل الفلايك جايه ياريت
واوعى ياواد شنيار ميه
دي الموجه ياولدي عفيه
كام موجه جايه مهديه
تمسي تصبح ع العفاريت
البحر عمره ما يبقي غتيت
بيبوس ايدين الرجاله
والرزق مهما البحر غويط
مضمون ومش عاوزه قواله
واوعى الحطاحط تجرحنا
خلينا يابني في مطرحنا
دي ثروة والمولي منحنا
اوعي الشعب مرجان ياسليط
حاسب ياقرني بلاش تنطيط
ولا انت ع الخلق عواله
صياد
1
ناولني ياسعد الوجله
دي سمكة تقلك ياصميده
صياد ثاني
رأسها يابوي قد العجله
ده قرش ياابو ليلة سعيدة
الريس بلاميطه
يلا يارجالة جبرنا
والمولي زاد فضله علينا
رزقنا من فضله سترنا
خير لولادنا واهالينا
بسرعه زود في السرعه
الفجر اهو هل علينا
صياد3
يومين بحالهم في المالح
والرزق بينادي علينا
والميه حلوه مع مالح
ربك بفضله مراضينا
صياد 4
شغل وشقا والرزق حلال
محلا اللقا مع أهالينا
الصبر ياابا صبر جمال
ما بين شطوطنا والمينا
نكسب ومن كد أيدينا
الريس بلاميطه
سمعنا قولك ياحميده
وارقع ياواد وقول موال
واشرح لنا حال العشاق
صوتك ياحلو يزيدنا جمال
ربك من فضله راضينا
سوي في بحارنا واراضينا
عاشقينها في البحر المالج
في البر ننقش اسامينا
حميده
ياللي انت غاوي الجمال
ف القبر طل وشوف
تلقي الجمال اهو زال
والعضم صار مكشوف
ده ياما غيرك عشق
حسان الوف والوف
ارضي بمقسمومك
اصل الرضا موصوف
سبحانه جلا علاه
عطانا كشوف وكشوف
ياللي هويت الجمال
ع القبر بص وطل
فين الجمال ياجدع
صبح القليب معتل
يارب لجل النبي
اكفينا شر الذل
ونرضى باللي انكتب
نحياها ورد وفل
ابن اللئام اتنصف
وابن الكرام انذل
قالوا زمان بالمثل
فيه ناس بتشرب عسل
وناس بتشرب خل
وناس بعشقها
فيها الميزان اختل
ياللي انت غاوي الجمال
عشق الجسد فاني
بتطلب الربح من جسد
تحت التراب فإني
العين ع الخد سالت
مستني ايه تاني
صياد 1
يابووووي
كمان ياحميده ياابو الكلام ع الكيف
سمعنا تنهيده
نسمه في حر الصيف
ع الدنيا ياواد اغراب
وضيف يسلم ضيف
صياد 2
كمان ياخال
علي راي عمك جاهين
يا غزال ياغزال
ده العشق حلال
دوبني انا دوب
حميده
حتي جمال الخدود
راح نورها بثواني
ربك ده واحد احد
ومن عداه فاني
ياللي انت غاوي الجمال
ف القبر بص وشوف
ما دايم الا الوفا
والحب والمعروف
الريس بلاميطه
ع المزاد هنشد رحال
ونوزع الرزق علينا
بزنود رجالنا ما عادش محال
وميعادنا بكره يااخينا

في مزاد السمك
اصوات كثيره
وصوت الريس بلاميطه
الواد عويضه اتأخر
بالتلج كالعادة
مع انه واصله التمن ياخلق بزيادة
وكل يوم مشكلة
وحالته متقندله
والجو حر ياناس
والسمكات هتبوظ
عيل كما النطاط
تقولش فرقع لوز
ولد خسيس ياجدع
ومصاحب الانجاس
مماطل ما عنده اساس
يحضر حميده يجر عربه كارو عليها الواح الثلج
معليش يامعلمي
اخر نوبه
وفي الميعاد مظبوط
واهي توبه
ام العيال تعبت
والبت زنوبه
سماح ياخال والنبي
وحق مين زرته
ومسكت شباكه
بالعين ونظرته
المعلم بلاميطه
بطل ياواد تلاكيك
شبعنا م التماحيك
سهرت فين تلاقيك
ياابو شيبه معطوبة
اسعي على رزقك
رب العباد يكرمك
ولا يوم يروح رزقك
ولا رب يوم يحرمك
ثم بلاميطه مخاطبا دلال المزاد

صباحو ورد ياسردينه
دلال مزادنا وعترتنا
المولي من فضله علينا
بالرزق زود فرحتنا
م البحر للشط لمينا
ربك يبارك لمتنا
خد الطرايح واتوكل
ع السعر خليك متمهل
الخلق ياخال معذوره
والرزق مالي المقطوره
ربك رازقها ومستوره
فتح عينك صحصح فنجل
سردينه
تكالنا ع المولي ياسيدنا
ونييجي تاني في مواعيدنا
ربك بفضله مأيدينا
وسابل الستر علينا
راح نبتدي بصباح نادي
بعد صلاتنا على الهادي
والبلطي صاحي بيتلعبط
قرب ياسيدنا الناحيه دي
راح نبتدي ونقول تلاتين
ربك معانا ياعم معين
مين راح يزود ف الطاولة
والسعر هادي علي الغاليين
اصوات35
40
45
مبروك عليك عم جعيدي
صوت مساعد الدلال يقيد في دفتره
ميه في خمسه واربعين
اربع تلاف ونص ربك كريم ومعين
نادي يا ريس جعيدي
فين الشيالين
ربك يسد عننا
وعن خلقه أجمعين
ربك يبارك للحلوين
يدخلُ المزاد فتاتين ترتديان الزي الشعبي وتتحدثان
يلا يامبروكه
تشوف لنا شروه
بلطي ودنيس على بوري
من باكيه على قدنا
من عند شنشوري
بياع وراجل جدع
ولا مرة خيره اتمنع
عن اللي مره دفع
واللي شكك مرات
القصه يا غاليه
عازمه حماتي زينات
وحمايا عم سعيد
عزومة مفتخره ولا نخلف المواعيد
اما بقي سلفي
يا اختي ده واد مفتري
طالب الابعد
ملوخية بالجمبري
ويااختي قليل التنا
قال كيفه سنجاري
جوازه ومهببه
ومنه اه ياناري
اديني ياعم معيط
الوقت عدي وفات
تعبت م التنطيط
خمس وست ساعات
الدلال
من بعده ييجي وقار وجمبري ودنيس
وبوري سعره رخيص
للهانم مع البشوات
والجمبري الجامبو
وايه ييجي جنبوا
وصفه طبيب معتبر
فسفور يغذي القمر
وعريس من البهوات
خلص المزاد كله اتراضي
وابن البلد ما يروحش فطيس
الكل يرزق من خيرة
هو الأحد وما فيش غيره
ع الشجر سبح طيره
جوه البحار تسبيح تقديس
ع المقهي المطرب الشعبي.
صياد ورحت اصطاد صادوني
برمش العين مع الحاجب وصدوني
تمت بحمد الله
@#الجميع