لسه ..بتحبها ؟؟

التقى محب وصديقه اليوم وبدأ الصيق الحوار مع محب ...

صديق :بص يا محب ،امبارح انت صدعتنى ومفهمتش منك حاجة ،ممكن

أسألك انا بقه ؟؟

محب :اتفضل اسأل انا سامعك كويس .

صديق :انا بحب واحدة وانت عارفها كويس ،وادينى ع الحال ده من

زمن ،واعتقد برضه انى هيا بتحبنى ،ليه بقى مش حاسس بالكلام اللى

انت مصدعنى بيه ؟؟

محب :هو انت بتعتبر ده حب ؟؟ طب قولى البنت دى رقم كام فى

قائمة محبوباتك ؟

صديق :صحيح يا محب انا اتعلقت بكام واحدة قبلها بس دى غيرهم

دى حاجة تانية خالص .

محب :طب خليك معايا ، ايه اكتر حاجة شدتك لها ؟

صديق :الحقيقة انا بحب الشعر الطويل وكمان تقاطيعها ملهاش حل

محب :طب لا قدر الله لو جالها مرض جلدى وبدا شعرها يسقط

والوجه الحسن راح ،برضه ساعتها حتبقى على نفس وضعك ولا ؟؟

صديق :فال الله ولا فالك يا شيخ .

محب :لا صحيح ،حتتغير ولا حتفضل ثابت ومشاعرك متتغيرش ؟؟

صديق :عشان مبقاش كداب مش عارف ساعتها حاعمل ايه

محب :عرفت ليه باقولك انى ده مش حب ،اعجاب تعلق اى حاجة

لكن مش حب .

صديق :طب امال ايه هو الحب من وجهة نظرك يا فصيح ؟؟

محب :الحب هو الحالة الوحيدة اللى بيتحرك فيها الانسان ويفضل

امرأة بالذات ،ويعلن ارتياحه لها ،

يفتح بيته وقلبه وعقله ونفسه وروحه وكل كيانة ليستقبل روحا أخرى

ويأنس بها وينتعش كما تنتعش الحياة كلها حينما تشرق الشمس وينتشر

الضياء ،هى حالة حضور كامل لطبيعة وعاطفة وعقل وثقافة الانسان

بلا كراهية ولا انانية ولا غيرة .

هى ..وهنا علا صوت شخير صديق ويبدو انه راح فى نوم عميق منذ

زمن ومحب مش دارى .

ونكمل الحديث فى المرة القادمة ان شاء الله

لسه بحبها ..

وفقلبى ساكن حبها ..

يا ريت يا شوق تروحلها وتوصفلها ...

سمع صديق هذه الكلمات من محب وراح يضحك بصوت مرتفع

هههههههههههههههههههههههه هههههههههههههههههههههه

محب :انت جيت يا صديق ؟؟وايه اللى بيضحكك قوى كده ؟؟

صديق:ايوة جيت ،ربنا بيحبنى علشان آجى فى اللحظة التاريخية دى ،ايه يا عمنا الهيام

والشاعرية دى ،على فكرة كلمات الاغنية مش صحيحة ،بس ما علينا ،عمرى ما

سمعتك بدندن كده يا قيس زمانك ،دودة كتب ومدمن قراية ماشى ،لكن دندنة وغنا

دى بقى الجديدة ،

محب :ايه يا صديق ،مالك فتحلى محضر وهات يا اسئلة ؟ثم مالها الكلمات ،اللى الفها

قال اللى عايزه وانا باقول اللى حاسس بيه ،وايه العجيب او الجديد انى انا اسرح مع

نفسى بكام بيت شعرى ،ما طول عمر الشعر مستخدم للتعبير عن الشجاعة والحماسة

والحب والفخر والرثاء وباقى العواطف الانسانية النبيلة ،

صديق :يا عم متبقاش حمقى كده ،خليك ايزى ،قولى بقى ايه الصهلله دى ؟؟انت قابلتها ؟

محب :انت عارف مبدئى يا صديق ،من ساعة النصيب ما حكم بالفراق وانا رضيت

بنصيبى ،واعتبرتها ذكرى حلوة فى حياتى ومحاولتش انى اقابلها ،واتمنيت لها السعادة

من كل قلبى ،وقلت كما قال المجنون :

قضاها لغيرى وابتلانى بحبها ..

صديق :ايه تكملة البيت دا يا محب ؟؟

محب :قضاها لغيرى وابتلانى بحبها ....فليت بشيئ غير ليلى ابتلانيا .

بس الشطر التانى من البيت مش بميل ليه قوى لانى بحس انه فيه اعتراض على الابتلاء