أخي الكريم
#مش_ضروري_انك_تعلق
لكن،،، #مهم_جدا_انك_تقرأ
مع حلقة جديدة من برنامج (صور مرفوضـــة)
سجال يومي بمشاركة الشاعر القدير
مصباح أبو حماد
(١٦) الحلقة السادسة عشر
...................
#الإحتكار_والإستغلال
،،،،،،،، ،،،،،،،،،،
ياعم يحيى مني سلام
مزاجي الليلة مُش تمام
فيه موضوع قوي مضايقني
هـ يكون عنه الليلة كلام
طيب قولي ياابو المصابيح
موضوعك ايه وبدون تلميح
ياللي سجالك يسعد قلبي
محلا القول واضح وصريح
عن موضوع... الإستغلال
لما الناس ضاق بيها الحال
ليه بتغلي السلعـة عليهم
وفاكر دا .. رزق حلال.؟
دايما ليك أطلع غلطان
وارجع في الاخر ندمان
فرصة وجاية ليه هتضيع
تجارة شطارة وحلوة كمان
كلمة تاجر تعني
"تقوى" عنده ويعرف دين
"أمين" مكانش من خاينين
"جرئ" تملِّى يقول الحق
"ورأفة"وقلبه كمان بيلين
يعنى قصدك ايه ما اكسبش.؟
ولاَّ ابيع بخس وبخسارة
تجاره حلال غيرها ما افهمش
ولاَّ غرضك بس أمارة
واللهِ غرضي ماهو أمارة
بيع واكسب .. بالمعقول
داللي سمى تجارة شطارة
فهمه خاطئ مش معدول
فرصة وجاية لحد الباب
وزبونها جاي باس الاعتاب
واللي يضيع فرصة عمره
تاجر عمره ضايع خاب
يعني تجارة ف غُلبِ الناس
وضمير عندك فيه وسواس
جاي مجبورلك بتقوم
تخنق
علشان طمعك هوّا أساس
الغاوي ما ينقط بطاقيته
يرهن نفسه ويبيع غيطه
واللي ما غاوي ليه يتعبنا
ليه تشغلنا... وتعمل زيطة
لما ظروف الناس دي بتحكم
وانت بطمعك جاي تتحكم
ولا بتفكر......... مرة تساعد
ولا بتفكر.......... أبدا ترحم
لما ارحم طب مين يرحمني
ناوي ياعمي هتجنني
كل يوم تعمل هليلة
قصدك ايه طيب طمنني
طيب إسمع مني يايحيى
إنت بتشتري وقت رواج
وتخزن ف مخازن الناحية
حتى تقتَّر ... ع المحتاج
مالك باللي يموت ولايحيا
ترفع سعرك قوي ... بمزاج
اصل البيع مكسب وخسارة
مصاريف شغل وبرضه إدارة
حكم السوق دايم وبينفد
وبرضه ياخال نفسي الامارة
إوعى تقوللي دا حكم السوق
دا حكم النفس مع الأباليس
اللي بيخفي السلعة ياسيدي
لجل يخلي الشاري فطيس
ليه بتحرم .شغل حلال.؟
سيدنا محمد كان بيتاجر
رزق وجايلي كما الشلال
قصدك نقفل كل متاجر
يووووه
إنت كلامك هايجنني
بيع وشرا ياعم حلال
لكن (حكرك) مايطمني
علشان هدفه الإستغلال
طيب قولي كلام معقول
حكم السنة وحكم الدين
جايز عقلي يكون مقفول
أخسر دنيا واخره ودين
اللي بيعمل زي حالاتك
آثم خاطئ بحكم الدين
أبو هريرة روى في حديثه
عن رسول رب العالمين(ص)
إلحق نفسك وارجع تايب
يبارك في تجارة الغاليين
تايب نايب نادم جايز
أنول رضا رب العالمين
تايب جايز اصبح فايز
أدخل جنة مع الصالحين
توبة ونوبة ورب غفور
ربك يسدل أغلى ستور
ربك يجعله يوم ف ميزاني
بين الخلق أكون مستور
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
طب انت جي بكرة ياعم
طبعا جاي ياخفيف الدم
بكره كلامنا يكون عن ايه؟
بكرة نقول . مستعجل ليه؟
اليوم في 9:29 am من طرف مريم صلاح
