قصه #سيدنا# #يوسف من ضوء الكتاب والسنة
وعلي الله القبول
قصة سيدنا يوسف عليه السلام
،،،،،،،،،،،،،،،،،،،،،،،،،،،،،،،،،
(( المقدمة))
مع سِيدنا
يوسف نعيش
في قصة مِتْعطرة
نبي، وإبن نبي
في كتابنا مسطرة
قصة خيانة وغدر
بعديها كان الندم
ربك آتاه بالنصر
ف دنيا تسوى العدم
نحكيها في أجزاء
منظومة بالأشعار
ف المولى عز رجاء
يلهمنا بالأفكار
(١)الجزء الأول
..................
بدأت بِرؤية حق
يوسف يشوف بمنام
يقول وقوله الصدق
مش وهم ولا أحلام
شاف الكواكب سجود
إحدي عشر بتمام
والشمس ويا القمر
ساجدين سجود إكرام
يعقوب وقلبه دليل
نبي وليه كرامات
الصمت ياابني جميل
والقول دا فيه عثرات
إحفظ ياإبني السر
في الصدر لو تقدر
ولا أغني عنَّك ضر
قدرك دا متقدر
أصله الحسد موجود
لمصيرنا بيغير
وإخوه ليك كايدين
وسوس لهم شياطين
ع المكر دوم قادرين
في جبينا متسطر
وبأمر رب مليك
هيتم فضله عليك
برساله ونبوة
كما سبق أبويك
يوسف مع اخواته
قاعد في حضن أبوه
والحب ليه خالص
الإخوه ليه كرهوه. ؟
وسوس شيطان الإنس
ويا شيطان الجن
والحل كان عندهم
عن حضنهم بعدوه
قالوا ياابونا ابعت
يوسف لقلب الروض
واحنا عليه حُرَّاس
وعد وكمان مفروض
خليه كمان يلعب
معْنا ماراح يتعب
واحنا عليه حافظين
لا يبعد ولا يغرَّب
يعقوب في قلبه شكوك
لحُّوا عليه أكتر
قال أخاف م الديب
وخوفي عليه أكبر
لو تغفلوا عنه
قلبي هـ يتكدر
وتاني يوم الصبح
معهم يوسف أخدوه
في القلب زاد القرح
والشورة قال قتلوه
أو اطرحوه في الأرض
والحجة موجوده
آه من فعال إبليس
الديب أكل يوسف
وأمارة دمه قميص
لابوكم كمان ورُّوهـ
والحب يرجع لنا
من ابونا من تاني
ونكون كمان صالحين
م المكر آهـ ياني
الأخ رد وقال
في الجب راح نلقيه
وقصده زي ماقال
بعديها راح ينجيه
واللي معاه ربنا
في الكون لا شئ يأذيه
في الجُب آهـ ياصديق
يعقوب وقلبه فْ ضيق
رغم الأسي والألم
ليه ذكر ربه صديق
رجعوا فْ وقت العشا
والدمع مالي العين
يعقوب يقول ولدي
يوسف أجيبه منين
ردوا عليه بقميص
والدم كان كذاب
وقالوا أكله الديب
ولم غرس له ناب
يعنى قميصه سليم
فين نابه ديب الغاب
(٢) الجزء الثاني
.................
وقافلة بتعدِّي
ع الجُب بتهدِّي
والجهد نال منهم
نال العطش منهم
بعتوا رسول منهم
للجُب لجل الماء
البشر فاض منهم
وبشارة لواردهم
يابشرى هذا غلام
كمثل بدر تمام
هنبيعه غالي التمن
دا فْ حسنه ما رأينا
وان جار عليه الزمن
دا الضي في عنينا
وع العزيز أخدوه
دوغري التمن قبضوه
يوسف في قلب القصر
وعصر يسلم عصر
وعِشِق يوسف مصر
وصبح نبينا شباب
يوسف وعمره ما عاب
وزليخه خدها الشوق
لربيبها هامت بيه
بتقفِّل الأبواب
تعرض جسدها عليه
يوسف وبرهان رب
من كل شئ يحميه
يسبقها يوْصل باب
من خلفه بتشده
تقفل سبع أبواب
عنها الإيمان صده
والوفا لمن ربَّاه
في القصر عاش، وياه
كان زي إبنه معاه
وما كانش يوم سعده
لحظة العزيز يوصل
يسأل وايه بيحصل
تسبق زليخه القول
يوسف وكان مسؤل
أراد بأهلك سوء
ودموعها تسبقها
وعزيزها صدقها
وطفل كان محمول
ولا مرة نطق القول
بإذن ربك كريم
يفتح في باب مقفول
العبرة في قميصه
أمام أو من خلف
لو من أمام صادقة
وكادبة لو من خلف
نطق الوليد بالحق
صِدِّيقنا قوله أحق
قلب العزيز ينشق
يوسف برئ لم خان
ولا كان في يوم خوَّان
الحل في السجَّان
يوسف طلبها وقال
السجن ليا أحب
وكإنه تاني الجب
يوسف ده أجمل شاب
لكن إيمانه حماهـ
ومن كل كيد نجّّاهـ
النسوه تتكلم
وزليخه تتألّم
والشوق لصديقنا
في القلب بيعلِّم
كيد النسا مطلوب
واللي بات مغلوب
لوليمة تدعيهم
تحصل خطوب وخطوب
والمُدية في إيديهم
وزليخه تناديهم
يوسف وهل وبان
قطعوا أياديهم
قالوا دا مش إنسان
دا ملك بحق كريم
رحماكَ يارحمان
َربك في خلقه عظيم
قالت ليه تلوموني
يوسف ضيا عيوني
ولو ما نُلت المراد
هيدوق آلام وعناد
أو من ورا القضبان
هيعيشها بسجوني
(٣) الجزء الثالث
....................
في السجن بضع سنين
وزمايله مجتمعين
يدعوا .. لدين ربه
توحيد لرب معين..
أرباب تفرقهم
أم رب يجمعهم
علي قوله مجتمعتين..
وسألوا مرة سجين
عن حلم ليه بيمر
ِلسِيدُه يسقي الخمر
فسر ياسيدنا القول
وضح حقيقه الأمر
والثاني برضه سؤال
حلم ومالوش تفسير
علي راسه يحمل عيش
وبياكل منُّه الطير
إفتينا واشرح لنا
فسر وأوِّل لنا
نراك من الصالحين
وياريت بدون تأخير
يوسف يفسرها
بشرى يبشرها
والصدق غيره مافيش
هـ تعيش ياساقي الخمر
لسه باقي في العمر
هـ تموت ياصاحب العيش
أُذكرني عند عزيز
قالها لصاحب الخمر
وشهر يسبق شهر
وشهر يلحق شهر
يوسف في قلب الحبس
ربك بإيده الأمر
يدعي لرب الكون
ويبشر الصابرين
بأمر كن فيكون
وبقلب كله يقين
وعزيز يشوف أحلام
يسهر ولا بينام
يجمع لها الوزرا ومفسري الأحلام
بيشوف سبع بقرات
سمان ما ليها مثيل
ياكلهم سبع بقرات
الكل فيها هزيل
وسبع سنابل قمح
خضرا مندية
وسبع سنابل يابسة
ع الموت معدية
رؤيا ما ليها مثيل
وعجز ع التأويل
ومفسري الأحلام
قالوا ما لنا سبيل
وف لحظه يتذكر
الشاب ساقي الخمر
وصية الصدِّيق
وقال ياسيدنا الصبر
عندي ال يعبَّرها
والرؤيا يفسرها
فتي جميل وأمين
مؤمن وخلقه رزين
مولانا يصدر أمر
يكون هنا في الحال
لِ يفسر الرؤيا
تفسير وماله مثال
بعت العزيز يناديه
يفسر الأحلام
رفض يرد عليه
حكم البرإءة أوام
روح إسأل النسوة
وأديهم مع السكين
جمع النسا تشهد
شهدوا برؤيا العين
ما علمنا به من سوء
بالله كمان،، نِشهد
والحق بين اياديه
صاحب خلق أحمد
حصحص قوام الحق
وزليخه بيه تنطق
أنا اللي راودته
وبربه استعصم
ومين سواه أعظم
ومين سواه أحكم
يفسر الرؤيا
ولا تاني يوم أظلم
لجل أنال بُغيا
يوسف خرج م الحبس
يفسر الأحلام
سبع سنين دي سمان
وسبعة تاني عجاف
ياكلوا ما وفرتوا
الا القليل محفوظ
عزيز وقال ياسلام
وبيك أنا محظوظ
القمح في سنابله
وكل عام قبله
خزينة كما قبله
ولا مرة يبقي أشق
ومشورة من يوسف
صادق ناصح وأمين
أمين خزانه الأرض
والفكر حر مبين
(٤)الجزء الرابع
.................
سبع سنين بتمر
فيها العسل والمر
والفكر دايما حر
والنصرة للصادقين
من بعد سبعة سمان
ووصول لسبع عجاف
والأرض متشققه
والضرع صابه جفاف
ومصر دي محروسة ووزيرها ما بيخاف
ولا ظلم يوم عنده
ولا مرة فيه إجحاف
ووفود وراها وفود
طالبة عزيزك مصر
طالبة الغذا والقوت
والجوع عصرهم عصر
والإخوة صابها الألم
لا زرعة ولا قلعة
و الضرع جف تمام
وبعد منها الموت
وتفيد بإيه الدمعة
علي مصر شدوا رحال
وشدوا في الترحال
تركوا وراهم أهل
حياري نسا ورجال
علي مصر تأويهم
تحفظ زراريهم
بالعدل والقسطاس
دب الأمل فيهم
وعزيزنا يعرفهم
وهمَّا ما عرفوه
وزاد في إكرامهم
من بعد ما نكروه
سيدنا العزيز قال لهم
الكيل راح اوفيكم
ووصية في العودة
باقي أهاليكم
والرد ما أجابوه
لما بقى نرجع
وشيئ لنا يشفع
عنه نراود أبوه
قالوا عزيز وكريم
بضاعتنا مردودة
وشرط ليه ياعظيم
أخ يكون منا
أوصافه محدودة
يزداد معانا الكيل
ونحفظ أهالينا
يعقوب ويتألم
ويفتكر من غاب
يقول لأولاده
في لوم كبير وعتاب
ومنين يجيني أمان
والشعر مني شاب
وعيوني إبيضت
م حزني ع اللي غاب
وقدموا المواثيق
على كتاب الله
وأقسموا بعودة
وكله بأمر الله
لابد مجتمعين
إلا الخطر نخشاه
يعقوب يقول وصاياه
لأولاده ينصحهم
هـ تخُشُّوا من كام باب
والقصر يجمعهم
حاجة ف ضمير يعقوب
ولا يغني شيء عنهم
(٥) الجزء الخامس
......................
يحكي الكتاب ويقول
ويبدع التصوير
دخلوا على يوسف
دخول ذليل وكسير
آوي اليه أخوه
وقال له لا تبتئس
انا أخوك يوسف
والفعل منهم دنس
وربك هداه لفكرة
يفضل أخوه وياهـ
من يومها ولبكرة
يا سعده لما آتاهـ
حط السقاية في رحله
ونادى منادي ياناس
نفقد صواع الملك
هـ نفتش الأكداس
واللي معاه المكيال
الحكم يطلع ايه.؟
قالوا جِزا الخوّان
اللي انت تحكم بيه
طلع الصواع م الرحل
وقالوا لص لئيم
وعملها من قبله
أخوه وفكره سقيم
وأسرَّها يوسف
في نفسه كان عارف
ومكرهم موجود
ما شُفت له وصايف
الدمع بعيونهم
يقولوا ويلنا ياويل
خد حدّْ منا بديل
دا ابونا شيخ وكبير
وصبح ياسيدنا عليل
رد عزيزنا وقال
قولكم ده محض مُحال
فلا متهم،، ببرئ
في كافة الأحوال
نطق أخوهم حق
قال قلت مرة الصدق
ماارجعش حتى يعود
أخي.. ومعايا الحق
رجعوا أراضيهم
يحكوا ماحاق بيهم
يعقوب وحزنه يزيد
وقالوا عاللي جري
وأكِّدوه تأكيد
إبنك سرق،، واسأل
مين كان معانا هناك
والعير كمان تشهد
والقرية شاهدة ذاك
قام قال لهم مالكم
فين راحت ضمايركم
أسفي على يوسف
وأخوه اللي راح منكم
وف لحظة كت عيناه
م الحزن ياولداهـ
راح البصر منها
وهُمّه وحدهـ آساهـ
قالوا له يا أبتاه
هوِّن على نفسك
تفضل فاكر يوسف
حتى ياابوي تهلك
قال شكوتي لله
هوَّا بحالي عليم
وأعلم أنا بالله
مامنكم حد حكيم
طب عودوا إتحمسوا
يا أولادي.. واتحسسوا
عسى الجميع هيعود
من رَوْحُه .. لاتيأسوا
(٦) الجزء السادس
...........................
رجعوا إلى يوسف
شرحوا له مر الحال
يعقوب وزاد المرض
و ساءت الأحوال
آم رد يوسف قال:
فاكرين أكيد يوسف
واللي جرا منكم
ويقابل الأهوال
علي قلبه ماهُنتم
وبفضل رب كريم
مرفوع مكان عنكم
وإيه يفيد الندم
عفا الكريم عنكم
ردوا عليه القول
ربك غفور تواب
إنت أكيد يوسف
ولقانا بعد غياب
يعقوب لا فقد الأمل
والقلب منه شاب
قال قصتي عايشة
منقولة بالمسطرة
في كتاب أخي احمد
عبر ومتسطرة
لا لوم على الإخوة
ع البادية قوموا قوام
قلبي لفراق يعقوب
ياما شاف ف بعده الام
آهين ياإخوة انشق
يوسف وقلبه يدق
لحال أبوه بيرق
يخلع قميصه يقول
القوه على وجهه
يرجع بصير على طول
يعقوب يشم الريح
وف قلبه زاد تباريح
أشم ريح يوسف
جاية تمام بصحيح
قولوا حرض وعجوز
هالك صحيح ويجوز
لكنُّه رب كريم
بالصبر قلبي يفوز
وصل الجميع بادية
والفرحة دوم بادية
طرحوا قميص يوسف
رد البصر يعقوب
والنفس كات راضية
علي مصر شدوا رحال
وجدُّوا في الترحال
يعقوب ونال المنى
صبرا جميل ياخال
يوسف بقلب وجيب
وسماح جميل وعجيب
ع العرش رفع أبويه
وقال.... ولا تثريب
سجد الجميع جمعا
وتاني التقوا جمعا
والطاعة ليه سمعا
والرؤية تتحقق
واخواته بتصدق
قول الإله أصدق
خروا سجود تكريم
وبفصل رب كريم
تنتهي القصه
ولا عادش فيه غصة
من نور كتاب الله
قصة ورا قصة
من دمي مكتوبه
بالحرف محسوبة
قصه واعجوبه
والعبرة مطلوبة
من نور كتاب الله
كتبها عبد الله
يحيي واشعارها
راجعها أخوه مصباح
هاموا في أنوارها
وان مد ربي العمر
من تاني اكررها
مع نبي ورسول
ونفيض كمان في القول
دعواتكو بالتوفيق
ونقول يارب قبول
@#الجميع
اليوم في 9:29 am من طرف مريم صلاح
