Hitskin.com

أحلام وأمنيات.. منها ماهو جاد ومنها ما تميز بالطرافة
وخفة الدم ؛ صاغ المصريون من خلالها مواصفات رئيس مصر القادم كما يتمنى،

كل
منهم، فأطلقوا حملة على موقع تويتر للتواصل الاجتماعي حددوا من خلالها
الشروط الواجب توافرها في الرئيس القادم، وتجنبوا في كثير منها ما كان يميز
الرئيس المخلوع مبارك، رافضين أن تتوافر تلك المواصفات أيضا في رئيسهم
القادم وكان من أبرز تلك المواصفات مايلي :
- ينزل الشارع يمشي فيه بنفسه ويعرف الأخبار بنفسه من مصادرها المباشرة .
- يكون عنده مشروع قومي وياسلام لو خلى التعليم هو مشرعه القومي، عشان نقدر نحرر العقول ونبني فكر جديد يخلينا نبني مصر صح .
-
ميكونش ليه أي سابقة ولا أي ضربة لا ضربة جوية ولا أرضية ولا ضربة جزاء
ولا ضربة شمس حتى عشان ميقعدش يذلنا ويقرفنا بيها كل شوية بمناسبة ومن غير
مناسبة .
- يكون بيحب مصر بجد مش بالكلام .
- لا يقوم باستبعاد واقصاء لأي فئة من ممارسة السياسة مش عايزين نسمع كلمة محظورة تاني .
- ميكونش في حاجة بتحز في نفسه .
- ميقولش دايما في خطاباته الإخوة المواطنون أو الإخوة والأخوات عشان بعد كدة بنضرب بالرصاص ولا بنطلع إخوة ولا حاجة .
- تكون خلفته كلها بنات ويكونوا ملهومش في السياسة ولا يعرفوا عنها حاجة .
- ميكونش اسمه صفة .
- يكون من ميدان التحرير .. مش ناطط عليه .
- مراته ملهاش دعوة بالستات ولا تعمل لهم كوتة ولانسبة في أي حتة في البلد والأحسن يكون مش متجوز أو أرمل أو يقعد مراته في البيت .
- ياخدنا قبل حلف اليمين نشوف أملاكه وأملاك عيلته .
- يكون عنده مشروع نهضة للأمة وليس مصر فقط لأن مصر هي قلب الحضارة الإسلامية .
- يعامل المصريين كلهم كأسنان المشط وملوش في الشللية لا هو ولا حرمه المصون ولا عياله .
-
يكون قارئ ومذاكر تاريخ كويس قبل ما يكون فاهم سياسة ويعرف إنها عمرها
مادامت لحد فمفيش داعي يتبت في الكرسي قوي كدة ويضطرنا في الآخر إننا نخلعه
منها بالعافية .
- يكون بياكل كشري وبيفطر فول وطعمية وياكل من العيش
بتاعنا اللي احنا بناكل منه مش بيستورد أكله هو وعيلته وحكومته من بره
بطيارات مخصوص.
- يكون مالوش في الكورة لا هو ولا ولاده. مش عايزين نشوف وشهم في أي ماتش و لا حد فيهم يتصل بخالد الغندور يقوم خلود يعيط.
- يكون بيفهم .. زهقنا من الناس اللي حافظة ومش فاهمة .
- يكون مبيخلفش عشان نتجنب مشاكل التوريث .
- يبقي معاه موبايل كارت مش خط وياكل من أكلنا ويلبس زينا .
- لا يهدي للمدام ولا للغرباء كنوز الفراعنة ويهتم بالمتاحف والآثار.
- ميطلعش في التليفزيون يسلم على الإسرائيليين وهم لسة ضاربين غزة ويحرق دمنا .
- يحترم سنه وميصبغش شعره .
- صلاة العيد يصليها في أى زاوية ومش كل ما يروح يصلى يطلع في التليفزيون .
- يمنع بيع أرض مصر وممتلكاتها وأي شيء يخصها لأي أجنبي ..آخرهم حق انتفاع وبس ويعرف إن في أجيال جاية ورانا .
- كل أسبوع يعقد مؤتمر جماهيري يستقبل فيه شكاوى الشعب بنفسه.
- يتحرك في المرور زينا لغاية ما يحل مشكلة الزحمة أو يتحرك الفجر عشان ميقرفش الشعب .
- لما يشوف علم مصر ينحني برأسه محييا.
- مبيقولش قلة مندسة ولا أصابع خارجية ولا رأس الأفعى.
- يرجع الصناعة الوطنية لمجدها بقى شكلنا وحش قدام تركيا والصين.
- يعتصم في التحرير لما يزهق من الحكومة.
- " يقدم تقرير مالي كل 3 شهور ويترجانا مرتبه يزيد عشان يبقي 4000 جنيه ".
- يهتم بإصلاح السجون ويطورها تحسبا إنه يكون واحد منها في يوم ما.
- يترك حزبه أول مايمسك الرئاسة و يرجع له بعد ماتنتهى المدة.
- لو قاعد مع رئيس دولة تانية و بياخد قرار مصيري يقوله استنى لما ارجع للناس اللى مشغلني .
- يقعد في شقة زي باقي الناس عشان القصور دي هندخل فيها الناس بتذاكر.
- يكون إنسان .. بيغلط ويعتذر .. بيحاسب وينتقد ..
- كل شهر يزور الـ28 محافظة بمعدل محافظة كل يوم واليومين الباقيين يقعد في البيت ميخرجش.
- ما اشوفش اسمه ولا مراته على أي جايزة أو مكتبة ولا مدرسة ولا شارع ولا محطة مترو ولا حتى موقف توك توك .
- يكون حامي حما البلد مش ناهب وسارق خير البلد .
- ميكونش محسوب على النظام السابق ولا من فلوله .
- ينجز في الخطب مش عايزين خطب طويلة ودش على الفاضي وفى الآخر بيلبسنا السلطانية ومحدش بيفهم منه حاجة .
- مبيحبش تتعمل له أغانى ولا أوبريتات مخصوص ويقعد يسمعها وهو بيهز في راسه من السعادة .
- ميبقاش عسكري ولا شارك في أي حرب عشان ميقعدش يذلنا بيها كل شوية .
- يوجه خطابه للأمه عبر اليوتيوب .
- يقدر يحقق الوحدة العربية ويكون هو القائد .
- يسمع للموعظة والنصيحة حتى لو من أعداءه في الفكر .
- يقود البلاد بمبدأ سيدنا أبو بكر الصديق رضي الله عنه : أطيعونى ما أطعت الله فيكم فإن عصيته فلا طاعة لي عليكم .
- مالوش دعوة بشرم الشيخ خالص احنا هنسمحله بعشة تبع الرئاسة في رأس البر .
- يكون له أكاونت على تويتر والفيسبوك .
- نكون عارفين عربيته ويمشي من غير حراسة ويوم الجمعة يركب المترو .
- يروح يزور طرة كل شهر عشان يتعلم من التاريخ ويمشي عدل والا هيحصل اللى قبله.
- لا اسمه بالكامل ولا حد من قرايبه يكون فيه مبروك أو مبارك أو حتى الله يبارك فيك .
- ميكونش ليه أدنى علاقة بشرم الشيخ ولا كفر الشيخ أو أي حاجة تنتهى بشيخ ويكون عنده فوبيا من الطيارات .
- يعرف كويس ان لغة الحوار مع الشعب اهم بكتير من اتخاذ القارات .
- ميكونش مشتري نجمة في السما أو بيكتب اسمه على بدلته .
- متبقاش صوره في وشنا في كل حتة نروحها .
- يوم ما تحصل كارثة لا قدر الله يتحمل المسئولية .
- يشعر دائما أن وظيفته مسئولية شديدة وأمانة وليست سبوبة و مصلحة وتظبيط .
- مش كل ما يشيل وزير فاسد يعينه في المجالس القومية المتخصصة .
- يعرفنا هو وعيلته بقبضوا كم في الشهر .
- له عربية واحدة بس هو وعيلته وهو اللي يروح يعملها صيانة في التوكيل .
- يكون عنده كرامة وبيفهم بسرعة عشان لما نقوله ارحل مش عاوزينك يمشي على طول وميقرفناش .
- يسمع كل يوم على الريق أغنية دامت لمين .

الله على الشعب المصرى الله تسلم نبيل اشكرك
الله يحفظك نبيل

نفع الله بك المسلمين نبيل ..

جزاك
الله خير

_________________

اللهم كما علمت آدم علمنا وكما فهمت سليمان فهمنا
اللهم كما أتيت داود وسليمان علماً علمنا
والحمد لله الذى فضلنا على كثير من خلقه تفضيلا

» المصريون يعودون إلى ميدان التحرير لإلغاء الطوارئ وتفعيل قانون الغدر
» لابد أن نعلم الشباب القادم على الزواج
» هل يكون Duolingo الهدف القادم لشركة غوغل ؟

Hitskin.com

المصريون يحددون مواصفات رئيسهم القادم،فما هي؟!