مجمع سجال برابطه العاميه المصريه
اوعي ف يوم وتبات مهموم
ارمي حمولك ع القيوم
خلق الدنيا ف ست ايام
كان قادر يخلقها في يوم.
كان قادر يخلقها في ثانيه
دنيا رضيه ودنياك فانيه.
انسي همومك واللي يلومك
قل له تكالي ع اللي خلقني
قادر يصلح حالنا بثانيه
اوعاك يابني من اللي يغشك
او يضحك بالكدب ف وشك
او تامن يوم خوان
ياكل دايما اي خوان
وارمي حمولك غ الديان
تلقي الدنيا لذيذه وسهله
واللي يحبك اوعي تسيبه
في اول جوله تبقي نسيبه
وان حسيت جواه بنداله
دوغري ياصاحبي نصيحه تسيبه
شيل من فوق وشك تكشيره
راعي حقوق الناس والجيره
راعي ربك راعي ضميرك
مش دايم غير حسن السيره
وان كسروا في مره قليبك
قوم واعمل له كام تجبيره
لما تلاقي بنت الريف
تلقي محبه خاليه الزيف
اوعاك تعمل زي سيزيف
قول ياعبير انا جاي لك ضيف
مهما كان الوضع مخيف
مهما كان حاضرنا سخيف
هات خلجاتك واوصل عندي
او لعبير اهي بنت الريف
اوعاك تزرع في حيضان بور
في وسط الضلمه بيطلع نور
بكره الفجر الباسم يظهر
شايل فرحه هنا وسرور
اوعي تبات متنكد شاكي
او لعدوك تظهر باكي
قول للفرحه هنستناكي
بعد ساعات او بعد شهور
عدي بحورك اوعي تخاف
عد نجومك باستلطاف
عدي لصاحبك غلطه وغلطه
حلوه الدنيا ولو عيش حاف
مهما تلاقي الدنيا تعاند
او فيه عزول دايما ييكايد
ابني زريبه والف مداود.
احبس فيها واوعي تناهد
احبس فيها اللي يعاندك
وادي قليبك للي يساندك
افرش جوه صوان في مساندك
ربك وحده صاينك ساندك
لو يوم حظك هيآتي
لو ضرير راح تبقي ساعاتي
لو اعرج تكسب في سباق
اصل ربك هو العاطي
اشكر ربك والله يوماتي
لما الحظ الحلو يأتي
بكره اتجوز احلي عروسه
بكره الباسم يحيي حياتي
سلم امرك للي نشاك
تلقي ماشيه الدنيا معاك
او تجبر او تتكبر
تلقي وشك محل قفاك
حلوه الدنيا زي السكر
حلوه جميله محلا العنبر
لما تعاند فيها بتخسر
لو تماشيها بدري بتجبر
ارمي همومك واوعي تفكر
خليك صادق واوعي تمكر
حلوه الدنيا وزي السكر
قوم علي شغلك بدري وبكر
هات بطيخه وانت مروح
اوعي تخش البيت تتطوح
تبقي الوقعه ياعمنا سوده
تلقي الحرمه تنوح وتشوح
مهما تبات حزنان وجعان
او بتقاسي م الحرمان
لو قفلت ابواب الدنيا
سبح ربك تلقي بيبان
مهما الدنيا تاخد منك
ارمي حمولك ايه هيهمك
داهيه تاخدك بلوه تسمك
لو ما رميت الحمل علي الله
بحور الشعر ما هيش كافياني
بيت ورا بيت راح تبقي مباني
بكره الحظ لما يجييني
لم اوراقك وابقي انساني
خلي الدنيا تبقي بايدك
خلي تكالك دوم علي سيدك
ارمي هموم الدنيا بحالها
تبات مهموم ايه هيفيدك
ارمي حمولك علي نشاك
اصبح زاهد م النساك
افتح باب ومتين شباك
رب الكون ولا يوم ينساك
أمس في 10:48 am من طرف مريم صلاح
